PAGBABASA SA GABI
madalas sa gabi ako nagbabasa
pag buong paligid ay natutulog na
napakatahimik
maliban sa hilik
aklat yaong tangan habang nag-iisa
sa ibang lupalop ako naglalakbay
sa ibang daigdig ako nabubuhay
habang naririnig
ang mga kuliglig
sa ibang lupain ako'y nagninilay
bukas pagkagising, babalik sa mundo
at pakikibaka'y punong-puno rito
mahal ang bilihin
nagmumura ka rin
namamayagpag pa'y gahaman at trapo
nagbabasa ako hanggang hatinggabi
at inuunawa ang tagong mensahe
may planong kumatha
ng kwento't pabula
pag biglang inantok, tutulog na dine
- gregoriovbituinjr.
01.11.2025
Walang komento:
Mag-post ng isang Komento